जगद्ज्योती महात्मा बसवेश्वर आर्थिक विकास महामंडळ
प्रस्तावना
वीरशैव-लिंगायत समाजाच्या सर्वांगिण विकासासाठी व आर्थिक उन्नतीसाठी प्रयत्न करण्याकरिता महाराष्ट्र राज्य इतर मागासवर्गीय वित्त आणि विकास महामंडळांतर्गत, उपकंपनी म्हणून जगद्ज्योती महात्मा बसवेश्वर आर्थिक विकास महामंडळाची (उपकंपनी) स्थापन करण्याबाबत दिनांक 21.07.2023 रोजी झालेल्या मा. मंत्रिमंडळ बैठकीमध्ये निर्णय घेण्यात आला. त्यानुसार, दिनांक 09.08.2023 रोजीच्या शासन निर्णयानुसार इतर मागास प्रवर्गातील वीरशैव-लिंगायत समाजाच्या सामाजिक व आर्थिक विकासासाठी जगद्ज्योती महात्मा बसवेश्वर आर्थिक विकास महामंडळ स्थापन करण्यास शासन मान्यता देण्यात आली. महाराष्ट्र राज्य इतर मागासवर्ग वित्त आणि विकास महामंडळाच्या नियंत्रणाखाली सदर उपकंपनीचे कामकाज चालविण्यात येईल.
| अनुक्रमांक | पद | भूमिका |
|---|---|---|
| 1 | मा. मंत्री, इतर मागास बहुजन कल्याण | पदसिद्ध अध्यक्ष |
| 2 | शासन नियुक्त पदाधिकारी | उपाध्यक्ष |
| 3 | अपर मुख्य सचिव / प्रधान सचिव / सचिव, इतर मागास बहुजन कल्याण विभाग | संचालक |
| 4 | सह सचिव / उप सचिव, इतर मागास बहुजन कल्याण विभाग, मंत्रालय, मुंबई | संचालक |
| 5 | संचालक, इतर मागास बहुजन कल्याण संचालनालय, पुणे | संचालक |
| 6 | व्यवस्थापकीय संचालक, महाराष्ट्र राज्य इतर मागासवर्गीय वित्त आणि विकास महामंडळ, मुंबई | संचालक तथा व्यवस्थापकीय |
| 7 | अशासकीय सदस्य – 3 | संचालक |
उपकंपनीचे कार्य
- वीरशैव-लिंगायत समाजाच्या कल्याण व विकासासाठी काम करणे.
- वीरशैव-लिंगायत समाजाच्या व्यक्तींना अल्प व्याज दराने स्वयंरोजगाराकरिता कर्ज उपलब्ध करुन देणे व त्याची वसूली करणे.
- वीरशैव-लिंगायत समाजाची आर्थिक स्थिती सुधारण्यासाठी पतसाधने, साधनसामुग्री आणि तांत्रिक व व्यवस्थापकीय साधने पुरविणे.
- वीरशैव-लिंगायत समाजासाठी कृषी उत्पादने, वस्तू, साहित्य आणि सामुग्री यांची निर्मिती, जुळवणी व पुरवठा यासाठी आवश्यक वाटतील अशा सेवा देणे.
- वीरशैव-लिंगायत समाजाच्या कल्याणासाठी योजना सुरु करणे आणि त्यांना चालना देणे व योजनासाठी अहवाल तयार करणे.
- महाराष्ट्र राज्य इतर मागासवर्गीय वित्त आणि विकास महामंडळाच्या धर्तीवर शासनाने मंजूरी दिलेल्या योजना राबविणे.